Demagun bihar gure etxeak utzi behar ditugula halabeharrez, bizilekua 60km-tara aldatu behar dugulako, istripu nuklear batetik aldentzeko ahaleginetan. Ezingo genukela aurrerantzean Salbajea, Bakio, Mundaka, ez eta Orrua edo Zurriola surfeatu.

Hau da Fukushimako prefekturan bizi ohi ziren milaka surfistek jasatzen ari direna. Japonian gertatutako ezbeharra ondorio ugari izaten ari da. Milaka hildako, kostaldeko herriguneetan beldurra nagusitu da, eta gainera Fukushimako zentral nuklearraren istripuaren ondorio ikaragarriak. Gertaera honek egungo historioa markatuko du.

Hainbat artista japoniarren argazkiek Miyagi eta Fukushima prefekturetara hurbilduko gaituzte, gertatu ezbeharrak gogorren astindu duen guneetara, alegia.

Erakusketa honen bitartez Japoniako eremu ezezagun honen aberastasuna eta edertasuna helarazi nahi dizuegu, arrantzale eta surfista anonimoen bizimoduaren ildotik. Guztientzat garai hobeak izan zirenetara eramango gaituzten argazkiak dira. Erradiakzioaren sugarrak lekuz kanpo utzi ditu mundu mailako hainbat olatu. Bertakoek, munduko toki majikotzat zuten horretan ezingo dute surfeatu. Euskal Herrian ez dugu Lemoiz lanean ikusi, baina une batez, eta Fukushima inguruko biztanleriaren lekuan jartzeagatik bada ere, demagun inguruko erradiakzioaren eraginez gure olatuetatik hurrundu beharra daukagula.